Карняплоды мыюць валасяной шчоткай, чысцяць ад лупіны і здрабняюць на буйнай тарцы. Здробненую масу ўкладваюць у рондаль, дадаюць пітную ваду (на 1 кг масы 1 шклянку), накрываюць вечкам і тушаць да поўнага размякчэння.
Затым гэту масу лёгка прэсуюць. Атрымліваюць каламутны сок без мякаці, пакінуты жмых праціраюць праз сіта ці пры дапамозе іншых прыстасаванняў і атрымліваюць маркоўнае пюрэ.
Для атрымання соку з мякаццю ўсё атрыманае пюрэ змешваюць з сокам-самацёкам. Для гэтай мэты можна выкарыстоўваць міксер. Дадаюць цытрынавую кіслату па густу (прыкладна 5-6 г на 1 л).
Затым сумесь хутка даводзяць да кіпення, памешваючы кіпяцяць 2-3 хвіліны, разліваюць у падрыхтаваную тару і зашпунтоўваюць. На 1 л маркоўнага соку расходуюць 1,2 кг морквы.
Для паляпшэння густу ў маркоўны сок перад ужываннем дадаюць цукровы сіроп 30%-вай канцэнтрацыі ў суадносінах 1 : 1 (для сіропу 0,3 кг цукру, 3,5 шклянкі вады). Сокі з карняплодаў перад стэрылізацыяй можна па густу падсаліць.
Выкарыстоўваюцца яны як паўфабрыкат для вырабу купажаваных сокаў, напояў. З'яўляюцца выдатнымі заправамі – салерны і пятрушачны як араматызатары, а бурачны і маркоўны як фарбавальнікі.
|