Узяць свежыя баравікі, сабраныя ўвосень, скласці іх у гаршок, пасаліць, даць пастаяць 1 суткі, часта іх памешваючы.
Праз суткі зліць з іх сок у рондаль, працэджваючы скрозь сіта, падагрэць гэты сок на пліце так, каб быў ледзь цёплым, заліць ізноў ім грыбы.
На другі дзень ізноў зліць, падагрэць больш, чым у першы раз і зноў заліць грыбы.
На трэці дзень зліты сок ізноў падагрэць так, каб быў даволі гарачым, заліць ім грыбы і пакінуць так на 3 дні.
Потым закіпяціць грыбы разам з сокам. Калі астынуць, скласці ў слоік, у гаршок ці дубовае вядро, капялюшыкамі ўгару, заліць тым жа расолам, а зверху растопленым, але ледзь цёплым тлушчам, абвязаць пузыром.
Перад ужываннем замачыць на некалькі гадзін у халоднай вадзе, а пасля паставіць іх на пліту і падагрэць з імі ваду, змяняючы яе некалькі разоў, пакуль не выйдзе з іх уся соль.
|