Добра спелыя здаровыя персікі з сакавітай, інтэнсіўна афарбаванай мякаццю мыюць і выдаляюць з іх костачкі.

Затым награваюць пры тэмпературы 75-80 °С у рондалі з даданнем невялікай колькасці вады (1 шклянка на 2 кг пладоў) .да размякчэння.

Гарачую развараную масу праціраюць праз сіта ці прапускаюць праз сокавыціскалку. Атрымліваецца даволі густое пюрэ.

Адначасова ці загадзя рыхтуюць цукровы сіроп 20- 30%-вай канцэнтрацыі ў залежнасці ад густу персікаў. Для гэтага ў рондаль наліваюць ваду і дадаюць цукар (на кожныя 3,5-4 шклянкі вады 0,2-0,3 кг цукру).

Даводзяць да кіпення і кіпяцяць на павольным агні, пакуль цукар цалкам растворыцца. Гарачым фільтруюць праз фланэль, марлю ў некалькі пластоў ці вату.

Затым сіроп змешваюць з персікавым пюрэ ў суадносінах 1 : 1, г. зн. на 1 л пюрэ 1 л сіропу. Сумесь пры магчымасці ўзбіваюць міксерам, у выніку здрабняецца мякаць, сок пры захоўванні распластоўваецца менш.

Сок можна ўзбіць непасрэдна перад ужываннем. Сумесь сіропу з пюрэ награваюць да 80 °С, разліваюць у падрыхтаваныя слоікі і пастэрызуюць пры тэмпературы 80-85 °С слоікі ёмістасцю 0,5 л 15 хвілін, 1л - 20 хвілін, 3 л - 25- 30 хвілін.