На 10 слоікаў ёмістасцю 0,5 л неабходна:

-свежых агуркоў - 3,3 кг,

-пятрушкі -15 г,

-кропу - 50 г,

-салеры - 30 г,

-лісцяў хрэна - 30,

-лісцяў мяты - 3 г,

-часныку - 15 г,

-чырвонага струкавага горкага перцу - 3,5 г,

-духмянага перцу ў зернях - 30 шт.,

-лаўровага ліста - 7 шт.,

Марынад:

-вады для марынаду - 2 л,

-солі – 100-120 г,

-воцатнай кіслаты 9%-най канцэнтрацыі - 230 мл.

Адабраныя агуркі мыюць і замочваюць у халоднай вадзе на 6-8 гадзін. За гэты час 2-3 разы змяняюць ваду. Зеляніну перад кладкай у слоікі старанна мыюць, затым наразаюць на кавалачкі даўжынёй 4-6 см.

На дно слоіка ўкладваюць трэцюю частку спецый, якія неабходны для аднаго слоіка, затым вертыкальна ўкладваюць агуркі да паловы вышыні слоіка. На агуркі першага шэрагу ўкладваюць другую частку спецый і зноў агуркі, але гарызантальна, а зверху - пакінутую колькасць спецый.

Для слоікаў ёмістасцю 2-3 л першы шэраг агуркоў таксама ўкладваюць вертыкальна, а астатнія гарызантальна. Напоўненыя слоікі заліваюць гарачым (80 °С) марынадам, прыгатаваным наступным чынам.

У эмаляваны рондаль наліваюць ваду, дадаюць соль (50-60 г на 1 л вады), награваюць да поўнага яе растварэння і фільтруюць сумесь праз 3-4 пласты марлі, дадаюць воцатную кіслату.

Марынад кіпяцяць каля 2 хвілін, заліваюць ім напоўненыя слоікі, накрываюць іх пракіпячонымі лакаванымі вечкамі і ўсталёўваюць у рондаль з вадой, нагрэтай да 60-70°С, для пастэрызацыі. Час пастэрызацыі пры 90 °С для слоікаў ёмістасцю 0,5 л - 10 хвілін, 1 л - 15 хвілін, 3 л - 25 хвілін.

Тэмпература вады ў рондалі не павінна перавышаць 90° С, бо ў адваротным выпадку агуркі размягчацца. Па канчатку пастэрызацыі слоікі герметычна зашпунтоўваюць, перагортваюць уніз горлачкам і астуджаюць.