На адзін слоік
- баклажаны абсмажаныя - 175 г,
-цыбуля - 35 г,
-морква - 35 г,
-перац салодкі - 70 г,
-тамат-пюрэ - 175 г,
-зеляніна кропу і пятрушкі (пароўну) - 5 г,
-соль - 5 г.
Падрыхтаваныя баклажаны парэзаць на кавалачкі ці кружочкі таўшчынёй да 1,5 см, на 10-15 хвілін пагрузіць у трохпрацэнтны раствор солі для выдалення гаркаты. Затым раствор зліць і даць сцячы вадкасці. Кавалачкі баклажанаў абсмажыць у алеі з двух бакоў, паскладаць на бляху і даць сцячы лішняму алею.
Падрыхтаваны салодкі перац нарэзаць кавалачкамі шырынёй не больш за 2 см. Вычышчаную моркву нарэзаць у выглядзе локшыны нажом. Памеры кавалачкаў павінны быць не больш за 0,5-0,7 см. Нарэзаную моркву абсмажыць у алеі да гатовасці.
Цыбулю нарэзаць кружочкамі і абсмажыць да залаціста-жоўтага колеру. Зеляніну пятрушкі і кропу перабраць, адлучыць ад цвёрдых частак сцябла, прамыць, даць сцячы вадзе і дробна нарэзаць ці пасекчы сякачом. Са свежых таматаў ці таматавай пасты за паўгадзіну да ўжывання прыгатаваць таматавы соус.
Для гэтага ў рондалі з нержавеючага металу таматавую пасту развесці вадой (на адну частку пасты - 2,5-3 часці вады), закіпяціць, дадаць па рэцэпту зеляніну і гародніну (акрамя баклажанаў), пасаліць і кіпяціць 8-10 хвілін.
Затым дадаць абсмажаныя баклажаны і кіпяціць на слабым агні без памешвання яшчэ 8-10 хвілін. У гарачым выглядзе паскладаць у слоікі ёмістасцю 0,5 л, накрыць вечкамі і стэрылізаваць 55 хвілін. Выкарыстоўваць як халодную гароднінную закуску.
|