На 10 слоікаў ёмістасцю 0,5 л неабходна:

-4,5 кг буракоў,

-100 г цукру,

-100 г солі,

-30 г 80%-вай воцатнай кіслаты,

-2 г карыцы,

-1 г гваздзічкі,

-1 г духмянага перцу,

-1 г чорнага молатага перцу,

-2 г лаўровага ліста,

-2 л вады

Свежы малады бурак старанна вымыць халоднай вадой, абрэзаць карані і лісце, бланшаваць у кіпячай вадзе 10-15 хвілін, ачысціць ад скуркі, прамыць у халоднай вадзе і нарэзаць кубікамі ці пласцінкамі.

Папярэдне на дно слоіка ёмістасцю 0,5 л пакласці 3-4 гарошыны духмянага перцу, 1 кавалачак ламанай карыцы, 2-3 штукі гваздзікі, 1 лаўровы ліст, а затым пакласці нарэзаны бурак і заліць слоікі гарачым марынадам (тэмпература не ніжэй 90° С).

Для марынаду: у эмаляваны рондаль наліць ваду, дадаць цукар, соль, давесці сумесь да кіпення і кіпяціць 10-15 хвілін. Адфільтраваць праз 3-4 пласты марлі, ізноў давесці да кіпення і ўліць воцатную кіслату.

Напоўненыя даверху слоікі накрыць пракіпячонымі вечкамі і устанавіць у рондаль з вадой, нагрэтай да 70-75° С. для стэрылізацыі. Час стэрылізацыі пры 100° С для слоікаў ёмістасцю 0,5 л -10 хвілін, 1 л - 15 хв. Па канчатку апрацоўкі слоікі герметычна зачыніць, перавярнуць уніз горлачкам і астудзіць.