Адсартаваныя па ступені сталасці плады мыюць, даюць сцячы вадзе, нажом з нержавелай сталі разразаюць на долькі, чысцяць ад скуркі, выдаляюць насенную скрынку, пашкоджаныя месцы і наразаюць на кавалачкі.

У пазбяганне пацямнення нарэзаныя кавалачкі захоўваюць у халоднай вадзе. Для надання мяккасці айву бланшуюць у кіпячай вадзе, для чаго ў рондаль ёмістасцю 3 л уліваюць 1,5 л вады, даводзяць да кіпення, апускаюць у яе нарэзаную айву пры дапамозе друшляка ці адмысловай сеткі для бланшоўкі і кіпяцяць 8-10 хвілін.

Затым сетку ці друшляк з кавалачкамі айвы апускаюць у ваду для астуджэння. Астуджаныя долькі айвы ўкладваюць у падрыхтаваныя слоікі і заліваюць кіпячым марынадам.

Склад марынаду на адзін 3-літровы балон ці тры адналітровыя слоікі):

-вады - 5 шклянак,

-цукру - 300-400 г,

-воцату 5-адсоткавага - 1 шклянка,

-гваздзічкі - 12 зерняў,

- карыцы здробненай - 2 г.

Для падрыхтоўкі марынаду ў эмаляваны рондаль уліваюць ваду, дадаюць гваздзіку, карыцу і цукар, кіпяцяць 5-7 хвілін, уліваюць воцат, даводзяць марынад да кіпення і заліваюць ім слоікі. Суадносіны кладкі: айвы - 60-65 адсоткаў, марынаду - 40-35 адсоткаў.

Залітыя слоікі накрываюць вечкамі, змяшчаюць у рондаль з летняй да 60 градусаў вадой і пастэрызуюць пры тэмпературы 90 градусаў: слоікі ёмістасцю 0,5 л - 15 хвілін, ёмістасцю 1,0 л - 20 хвілін, балоны ёмістасцю 3,0 л - 30 хвілін ці стэрылізуюць: слоікі ёмістасцю 0,5 л - 8 хвілін, ёмістасцю 1,0 л- 12 хвілін і трохлітровыя балоны - 25 хвілін.

Пасля пастэрызацыі ці стэрылізацыі слоікі неадкладна зашпунтоўваюць і правяраюць якасць упакоўкі. Астуджэнне - паветранае. Айва марынаваная падаецца ў выглядзе гарніра да мясных страў. Сезон падрыхтоўкі - лістапад.