Дробную рыбку, хвасты і голавы ад буйнай рыбы заліваю халоднай вадой і давожу да кіпення. Здымаю плеўку, памяншаю агонь, кладу соль, цукар з разліку кавалачак на два літра вады, перац гарошкам, пару цыбулін і вару адну гадзіну. Важна, каб агонь быў ціхі, інакш юха будзе каламутнай. Потым адцэджваю праз сіта булён у чысты рондальчык і давожу да кіпення. У кіпячы булён кладу спачатку тры-чатыры лыжкі прамытага проса, потым моркву (папярэдне нарэзаць саломкай). Працягваю варыць хвілін дзесяць. Дадаю бульбу і на яе апускаю кавалкі буйнай рыбы. Вару хвілін пяць-сем. Шумоўкай вымаю рыбу і перакладаю яе на талерку, потым можна будзе кожнаму дадаць па жаданні ў юху. У юху дадаю сталовую лыжку топленага сметанкавага масла, лаўровы ліст, пару долек душанага часныку, кроп. Выключаю агонь і пад вечкам даю пастаяць не меней 30 хвілін. Юха атрымліваецца без дробных костак, што важна, калі за сталом дзеці. Топленае масла дапамагае ўзмацніць водар рыбы, упрыгожвае юху залатымі бліскаўкамі і змякчае густ.