Бяруць салёны, звараны, вэнджаны язык і наразаюць тонкімі лустачкамі. Для падрыхтоўкі гэтай стравы выкарыстоўваюць адмысловыя бляшаныя разнастайныя формачкі (круглыя, авальныя і іншыя), глыбінёй у 2 - 3 см і ёмістасцю 200 - 250 г. Формачкі добра мыюць і падсушваюць, наліваюць у іх празрысты булён і кладуць кавалачкі морквы разнастайнай формы, крутыя яйкі, нарэзаныя на кавалачкі, лісцікі пятрушкі, лустачкі салёных агуркоў, памідораў і інш. Пры кладцы трэба мець на ўвазе, каб малюнак прыйшоўся на дно формачкі. Затым выкладзеныя ў формачку прадукты заліваюць празрыстым булёнам так, каб ён іх пакрыў. На жэле, якое ўтварылася, кладуць лустачкі языка і заліваюць яшчэ раз. Калі прыгатаваны такім чынам, аспік з языком добра застыне, формачку акунаюць у гарачую ваду і аспік выкладваюць на талерку.